Keçən gün ailəmizlə birlikdə geyim dükanlarından birinə girdik. Bizdən sonra başqa da bir ər-arvad içəri daxil oldu. Satıcı xanım onlara yaxınlaşıb çox hörmətli bir şəkildə cənaba: “Buyurun Müəllim! Necə bir şey isdəyərdiz?” - dedi. Üstündən bir az belə keçmədən xanımı kobud və savadsız şəkildə satıcı qıza hirsləndi ki;

 “Niyə məhs mənim ərimə müəllim deyirsiniz?”

Satıcı qız özünü itirərək “Nə deyə bilərəm axı?”- deyə xanımdan soruşdu.

Xanımı isə qıza: “Niyə ərimə müəllim deyərək onu alçaldırsan axı?” – dedi.

Bu əhvalatdan təsirlənərək məqalə yazmaq istədim ki, bəzi savadsız insanlara müəllimin nə dərin söz olduğunu izah edim. Bilirəm o sözü deyən xanım, bəlkə də, bu məqaləni heç oxumayacaq, amma oxuyanların bu səhvə yol verməyəcəyinə əminəm.

Məxluqlar  içərisində ən çox tərbiyəyə möhtac olan insandır. Həyatda ən ali peşə də insan yetişdirməkdir. Allah-Təala yer üzünə ən böyük insan tərbiyəçiləri olaraq peyğəmbərləri göndərmişdir. Yəni müəllimlik bir peyğəmbər peşəsidir. Lakin o qadın öz ərini bir saniyədə olsun peyğəmbər peşəsinə yüksəltdiyini düşünmədi. Bəli, hər kəsə müəllim demək olmaz! Müəllim sözünü ancaq müdrik, savadlı və o sözə yaraşan insanlara demək lazımdır.

İNSAN sözü 2 kökdən gəlir; Ünsiyət və Nisyan. Gəlin bu sözlərin mənalarına nəzər yetirək.

1. Ünsiyyət: İnsan kiminlə ünsiyyət etsə onun ruhuna bürünər. Ona görə də birlikdə olduğumuz insanlara diqqət etməliyik.

2. Nisyan: İnsan unutqan varlıqdır. Bu səbəblə yaradanı belə unudur. Deməli o xanım da bu bölməyə aiddir. Çünki, o xanım əlinə qələm almağı öyrədən, dünyaya baxışını dəyişdirən, bəlkə də ona ən böyük tərbiyəni verən müəllimini bu sözü ilə alçaltdı və unutdu.

Bəzən özüm-özümə fikirləşirəm görəsən o insanın müəllimləri ilə bir problemlərimi  vardı? Çünki qanunlardan biri də budur ki, qüsursuz bir tələbə istəyiriksə qüsursuz bir müəllim olmalıyıq. Yox-yox bu sözü deməklə məndə bir az kobudluq etmiş oldum ona görə ki, insanın nə qədər pis, kobud müəllimi olsa da bu böyüyəndə xatirələrlə birləşib yenə müsbət bir müəllim obrazı yaradır.

Bu yazıda o xanımı da, tanıdığım bəzi insanları da eyni tərəzidə ölçdüm. Məqaləmdə də sözün sonunu özümə deyil oxuculara saxladım.

Bir milləti məhv etmək üçün onun müəllimini gözdən salmaq kifayətdir

Anton Çexov

Bu məqalə mənim ilk göz ağrımdı. İlk dəfə Şəki bələdiyyəsi qazetində çap edilmişdir.