Milli mənlik şüuru dedikdə öz içində hissələrə bölünmüş vətənpərvərlik, milli-mənəviyyat və milli vicdan ağla gələn ilk sözlərdəndir. Elə söhbətə milli-mənəvi cəhətdən yanaşaq. Milli mənəvi cəhət dedikdə bizə mənsub olan mənəvi xüsusiyyətlərdən söhbət gedə bilər. Yəni xalqımıza aid olan adət-ənənələrimiz buna ən böyük nümunədir. Elə bunların qorunması da bizim mənlik şüurumuzun səviyyəsi ilə bağlıdır.

Müəllimim bu mövzu haqqında yazı yazmağımızı təklif edəndə, doğrusu bir az tərəddüdlü yanaşdım. Ona görə ki, bu gündəmdə olan, üzərində aparılan tədbirlərin saysız-hesabsız olduğu ağır mövzudur. Ancaq inanıram ki, öhdəsindən gələ biləcəyəm. Mövzunu açıqlayanda bir sual yarandı: milli şüur və milli mənlik şüuru. Mənlik sözünün istifadəsi düşünməyə vadar etdi. Elə evə gələn kimi ilk işim də bununla əlaqəli araşdırmam oldu. Mənlik şüuru hər bir şəxsin daxili xarakterini, insanlara və cəmiyyətə olan münasibətini bildirir. Mənim fikrimcə, ən böyük vətənpərvərlik insanda olan mənlik şüurunun güclü olmasıdır. Səbəbi isə mənlik şüuruna sahib olan gənc öz xalqını düşünən, onun uğrunda vuruşmağı, şəhid olmağı qəbul edən insandır, elə buna da vətənpərvərlik demirdik?.

Milli mənsubiyyətimizə xas olan ən mühüm əxlaqi hisslərdən biri də vətənpərvərlik hissidir. Vətənpərvərlik bu günün işi deyil. Onun çox qədim bir tarixi vardır. İnsanların öz elinə-obasına, öz ocağına, torpağına, öz xalqına, adət-ənənələrinə məhəbbət və sədaqətini ifadə edən bu hiss çox qədim zamanlardan meydana gəlmişdir. Xalqımız bu hisslərlə əsrlər boyu yaşamış, heç bir vaxt elinə, obasına, torpağına - bütövlükdə vətəninə biganə qalmamış, yeri gəldikdə hər cür fədakarlıq etmiş, vətəni uğrunda şəhid olmaqdan çəkinməmişdir. Vətəni alovlu məhəbbətlə sevməyən, vətən eşqi ilə yaşamayan adam çətin şəraitdə vətənə sadiq ola, onun uğrunda mətanət və qəhramanlıq göstərə bilməz.

Hər kəsin mənlik şüuru onun vicdanıdır. Vicdan sadəcə sözdə 6 hərfdən ibarət olan bir kəlimədir. Yəni gərçəkdə ən ağır mənaları özündə birləşdirir. Bu günə qədər tarixdə nə vicdansızlıqlar oldu, hələ izləri keçməyən, bu yerə qədər nə vicdansazlıqlar oldu ki, neçə min nəfərin soyunu kəsib sonra kobud mənada desək qarınlarını qaşıyıb alçaqca gülümsəyərək. Çox vicdansızlar oldu. Hələ də o vicdansızlıqların davamı gələrək TÜRK sözünün yox edilməsini istəyəcək qədər alçaqcasına edilən öz şüurlarını yeritmək. Öz şüurlarını yeritmək dedim ona görə ki, o da bir şüurdur. Məhv etmək, yox etmək, dünyanı ələ keçirmək, soy kökünü kəsmək, olmayan tarixlərini yazıb sonra da olmuşçasına arxasında durmaq, ya da kiminsə tarixinə mənəm-mənəm deyərək yiyələnmək, ən dəhşətlisi isə bütün dünyanın bildiyi, ancaq susduğu gərçəkləri yalanlayıb öz adlarına çıxmaq, şüursuz insanların beyinlərini doldurmaq, bax budur ən dəhşətlisi. Yeni nəslin beyninə yalanları yeritmək, elə olmayan tarixlərini olmuşcasına anlatmaq deyilmi?. Axı bizlərə gərçəkləri deməsələr, biz hardan bilə bilərik ki, məhz sandığımız gərçəklər hamısı puç və əfsanədir.  Baxın elə araya girib məni düşündürən də budur. Nəyə görə düşmənlərimiz körpə yaşdan öz uşaqlarını “Yat yoxsa TÜRK gələcək” deyə qorxudur?. Belə yetişdirməliyik indiki gələcəyimizi?. Qorxudaraq məcbur etməliyik nəyəsə?. Ya da gərçəkdən hər şey bele olmalıdır, biz səhv düşünürük?. Vətənpərvərliyi belə aşılamalıyıq?. Cavablandırmaq mənim kimi 15 yaşlı bir qız üçün bir az çətindir. Ona görə ki, səhv bizdədir? deyə sualla qarşı-qarşıyayam. Amma özümü nümunə göstərə bilərəm. Mən evdə heç vaxt yat düşmən gəlir sözləri ilə nəyəsə məcbur edilməmişəm. Mən yaxşı bilirdim ki, düşməndən qorxmazlar! Onun adını eşidəndə yatmazlar! Dik ayaqda durmaq lazımdır, heç bir düşmənı uyuyaraq qarşılamaq düz olmaz. Hər bir Azərbaycan gəncinin qanında var vətənpərlik. Onu bizdə yaratmağa ehtiyac olmadığından yalanlarla gözümüzü qorxutmurlar. Olmayan bir hissi insana öyrətmək üçün vaxt lazımdır. Elə onlar da bunu uşaqlıqdan edirlər ki, heç olmasa nəsə formalaşsın. Amma biz. Ehtiyac duyuruqmu bunlara?. Bizə sadəcə düşmənimizi göstərmək bəs edər. Geriyə qalan, nə etmək lazım olduğunu çox yaxşı bilir. Bizim yaşımız az olsa da, yaxşını pisdən ayıra bilənlərdənik. Çünki şahidi olmasaq belə tanklar altında qalanların, meşədə donaraq ölənlərin, ailəsini göz önündə itirənlərin nəvələriyik. Heç nəyimiz olmasa da, soyu Türk olanlardanıq. Bizdə qorxu yox, nifrət var. Ən vacibi isə heç kimin süni şəkildə yaratmadığı vətənpərvərlik, dövlət, xalqını düşünmək, onun üçün əlindən gələni etmək eşqi var. Baxın buna görə mənə nəyisə qorxudaraq etdirməyiblər.

Mən özümə bu sualı verdim. Mənim milli mənlik şüurum varmı, varsa onlar nələrdir? Xalqımı qorumaq, adət-ənənəmi qorumaq, milli-mədəni dəyərlərimizə sahib çıxmaq. Əgər bu düşüncələr məndə varsa, deməli, mən bu xalqın, müəllimlərimin, ailəmin öz zəhmətləri ilə ərsəyə gətirdiyi dəyərli incəsənət nümunəsi kimi qiymətliyəm. Bəli, gənclər, hər milli mənlik şüuru olan insan öz xalqı üçün ən məhsuldar təbii sərvətdən belə daha dəyərlidir.